jólin eru að koma! Er smá stress í mér, kvíði fyrir að vera ekki með soninn. En við eigum virkilega góða daga núna, njótum aðventunar, jólumst heima og úti.
Er búin að vera með verki í puttunum á að fara út að mynda, sl vika var svo fallegt veður, frost og stilla. En alltaf er komið myrkur þegar ég hætti að vinna.
Stoppaði við Mývatn á leiðinni heim, stillti upp þrífætinum og skeltli vélinni á standinn. Fraus nokkuð við að standa þarna, en einhvern veginn finn ég ekki fyrir því, ekki fyrr en ég hætti og er komin í bílinn aftur. Sonurinn alveg rólegur í bílnum, hann er orðinn nokkuð vanur mömmu sinni og hennar dyntum þegar vélin er nærri.
Þetta ætla ég að gera þegar sonurinn er hjá pabba sínum, fyrir jólin. Og um jólin. Ætla að vera úti með vélina, í myrkrinu, að æfa mig. Lærði helling bara á að taka þessa mynd í myrkri :)
mánudagur, desember 12, 2011
frostvetur
miðvikudagur, nóvember 23, 2011
veturinn..
mér finnst svo afskaplega dimmt núna. Og í morgun var snjór. Sonurinn agalega glaður.
Í gær hlustuðum við á jólalög, sungum og dönsuðum, var svo notalegt hjá okkur. Jólin eru bara eftir mánuð, svo rosalega fljótur að líða tíminn.
Mér gengur vel á Bjargi. Þar tek ég einn dag í einu, held í jákvæða hugsun, því jú ef maður hugsar jákvætt þá gerast jákvæðir hlutir. Mér meira að segja er farið að finnast þetta gaman. Og ég fann það þegar ég fór til Dublin og fór ekki í heila viku þá leið mér ekki vel. þannig þetta er allt af hinu góða :)
Ég sagði við vinkonu mína um daginn að ég væri stressuð yfir hlutunum. Jú það var eitt ákveðið að angra mig, en ég hef fundið lausn á því. En svo það að allt er í lagi, það stressar mig. Það gengur allt upp, ekkert sem er vesen, og ég hreinlega kann ekki á svoleiðis. Kann ekki að njóta stundarinnar þegar ekkert er að..
Þannig núna er það verkefnið mitt (ásamt Bjargi) að læra að njóta líðandi stundar :)
sunnudagur, október 30, 2011
dublin!
fimmtudagur, október 13, 2011
jólastrákur...
Álfkonur
Ég er í alveg yndislegum ljósmyndahóp – Álfkonum. Þar eru konur á öllum aldri, alveg yndislegar. Ég er að læra svo mikið af þeim og það er alveg virkilega stutt í hláturinn. Ein kom með frábæra klausu á facebook hjá okkur, sem ég varð að deila með ykkur:
“Á þessari mynd má sjá sjaldgæfa tegund kvenkyns spendýra, svokallaðar ÁLFkonur sem flakka um í litlum eða stórum hópum fjarri afkvæmum sínum og mökum. Það sem einna helst einkennir og sameinar þessa mislitu tegund er lítill svartur hlutur sem hangir um háls þeirra. Framan á hlutnum er svokallað þriðja auga spendýrsins sem nemur umhverfið á allt annan hátt en hin tvö gera. Litli kassinn með þriðja auganu sem ég hef kosið að kalla myndavél, nota ÁLFkonur til þess að nærast en kjörlendi þeirra er víðátta landsins frá sjávarmáli til hæstu fjalla. Tegundin er hörð af sér og nærist allan sólahringinn jafnvel þótt úti sé vonskuveður. Þegar kvöldar eiga ÁLFkonur það til að gefa frá sér óskiljanleg hávær hljóð einkum ef að tungl er fullt og norðurljósin dansa um himininn. Það er þó ekkert til að hafa áhyggjur af því tegundin er talin hættulaus. Þegar ÁLFkonur eru ekki á flakki um kjörlendið nota þær tímann til þess að þjálfa upp vöðvanna í andlitinu. Þá veður á þeim eins og enginn sé morgundagurinn og annars lagið má heyra frá þeim miklar rokur sem erfitt er að útskýra nánar. Samhliða þessum miklu rokum sem geta staðið frá nokkrum mínútum upp í nokkra klukkutíma taka þær bakföll og halla sér svo fram og hhhaaaalllllddddaaa!!! Skál :) “
Höf: Berglind H. Helgadóttir ÁLFkona
miðvikudagur, október 12, 2011
vetur ?
Jæja - þá kom frostið.. ekki snjórinn ennþá samt..
það er samt voða dimmt núna þegar klukkan hringir og ég finn alveg að ég er ekki alveg jafn spræk á fætur og fyrir td bara hálfum mánuði síðan. Vona að þetta sé bara því ég er að fara heldur seint að sofa.
Finn auka orku hjá mér samt - þe ég er ekki að sofna kl 8 eins og í fyrra - og samt ekki ná að vakna kl 7. Ég er full orku á kvöldin (skýrir hve seint ég sofna) og ég held það sé einungis vegna Bjargs..
finn samt kvíða fyrir vetrinum. Svo miklar breytingar í vinahópnum og ég er svo hrædd um að enda aftur bara single one out... finn strax breytingar nú þegar í þá áttina eitthvað en næ ekki að benda bent á þær. Ég er líka sjálf meira upptekin, meira að gera hjá mér.
En núna er "me time" - Guðrúnartími. Ég verð að hugsa og einbeita mér að því sem ég byrjaði á í haust á Bjargi, sem btw gengur vel og ég finn aukna vellíðan. Er búin að setja mér ákveðin markmið, næstu 3 ár verða helguð þessum markmiðum.
En sálartetrið þarf samt á félagshliðinni að halda líka.
þar til næst elskurnar ..
þriðjudagur, október 11, 2011
Norðurljósin
Fyrsta myndin mín af norðurljósum! Alveg dásamlega gaman að sitja úti í myrkrinu, með vélina og smella af, laga til, prufa nýtt, læra meira!
Ef skýjahulan hefði ekki verið til staðar hefði ég sennilegast verið úti alla nóttina, þetta er alveg dásamlegt! Núna verð ég alltaf með úlpu og teppi í bilnum, þá get ég bara farið út með vélina og þrífótinn og elt norður ljósin.
Þau eru svo falleg, þau dönsuðu fyrir okkur Álfkonurnar, græn með bleikum og fjólubláum borðum...
miðvikudagur, október 05, 2011
fyrsti snjórinn
sumir vöknuðu á undan klukkunni.. vöktu mömmu sína með að kalla innan úr næsta herbergi “mamma mammaaa það er kominn SNJÓR !!” Mamman leit á klukkuna; 06:30.. æði...
Sonurinn var á útopnu um morguninn, þyrlaðist um íbúðina, og mamman þurfti varla að benda honum á að klæða sig í útifötin. Og þurfti bara að segja einu sinni að nú þyrfti að slökkva á sjónvarpinu og finna skóna. það var ekki einu sinni vesen að finna kuldaskóna þó þeir væru inni í hjólageymslu, í kompunni síðan sl vetur. Venjulega hefði þetta ferli tekið nánast 10-15 mínútur; að klæða sig í útifötin, slökkva á sjónvarpinu og finna skóna (þó þeir væru bara við innganginn)
Og síðan heyrðist neðan úr stigaganginum; “mammaa ég er sko farinn að bíða eftir þér” Svona líka syngjandi kátur með nýja fallega hvíta snjóinn. Mamman gat nú lítið annað en samgleðst drengnum sínum, svona hamingja smitar út frá sér.
Mamman hefur venjulega aldrei glaðst yfir þessu blauta hvíta kalda, en í dag var þetta einhvern veginn öðruvísi. Hún tók þátt í gleðinni með drengnum, reif upp myndavélina nýju og tók eina mynd út af svölunum sínum. Sagði svo við þann stutta að hún ætlaði að taka nýju vélina og hans myndavél með í vinnuna, því þau gætu örugglega farið í smá myndagöngu eftir vinnu og skóla. Loksins búin að finna áhugamál sem hægt er að virkja ljósu hliðarnar á vetrinum.
Allt í einu, í fyrsta skipti á ævinni er snjórinn ekki svo óyfirstíganlegur, ekki svo hræðilegur, kaldur. Allt í einu er kannski veturinn ekki svo kaldur og dimmur..
mánudagur, október 03, 2011
það er alveg ótrúlegt hvað sumt fangar mann
mamma var að sýna Gabríel fingurbjargirnar sínar – og ég held að ég gæti setið endalaust og skoðað. Fólk hefur verið svo duglegt að færa henni fingurbjargir allstaðar frá – öllum heimshornum.
margar eru mjög venjulegar og “plain” – en samt koma þær frá löndum sem mig hefur ekki dreymt um að heimsækja einu sinni. Sumar eru gerðar sérstaklega til að fanga ferðamenn og eru algjört skart – eitthvað sem á svo heima í glerskáp til sýnis.
Einnig á hún gamlar fingurbjargir sem voru notaðar td í Belg, notaðar gamlar – sem gætu örugglega sagt frá svo mörgu…
sunnudagsheimferðin
og hvað er betra en að stoppa einhverstaðar í náttúrunni og æfa sig að taka fosa/vatn myndir ? Sonurinn hæst ánægður með þetta, honum finnst alltaf svo gaman að leika sér við Goðafoss - svo skemmtilegur sandurinn.
Ég vopnuð leiðbeiningum af netinu hvernig á að gera svona og svo hinsegin - sem er frábært til að byrja á - en svo leikur maður sér með vélina og þá einhvern veginn kemur mynd.
þessi litli foss er partur af Goðafoss. Hann liggur neðar í straumnum, rétt áður en maður kemur að göngubrúnni. Mér fannst hann svo krúttulegur - eins og hann sé með blóm í vasa/hnappagati, en á örugglega ekki sitt eigið nafn greyið..
Núna er mánudagur.. again.. Og heilabúið er ekki alveg komið úr helgarfríi ennþá - eða er að þráast við að samþykkja að það sé mánudagur.
miðvikudagur, september 28, 2011
Heimadagur í dag
Sonurinn er lasinn. Ekkert óhress, hann er með 1 stig og hæsi greyið. Reyndi að herða stofninn í gær, en hreinlega gat ekki horft framhjá því í dag.
þannig í dag liggur fyrir rólegur og notalegur dagur. Með smá dash af Bjargi í kvöld.
Sat í gær og las og las um myndavélina, myndatöku og uppsetningu mynda og samsetningu mynda. hrikalega skemmtileg lesning á mörgum síðum á netinu. Í gær var svo fallegur dagur. Mig langaði hreinlega bara til að vera úti með myndavélina. það er það mest afslappandi sem ég veit...
knús á ykkur - eigið góðan dag elskurnar !
mánudagur, september 26, 2011
Haustlitir
mér finnst bara svo gaman að taka myndir. Sat í skóginum í gær, bæði í regni og sól. Með og án varga. Ein með sjálfri mér. Og ég bíð þess að geta það aftur. þetta eru svo snilldar stundir, bara úti í náttúunni með myndavélina.
Mér hefur alltaf þótt gaman að taka myndir, af hverju hef ég ekki leyft þessu að þróast fyrr; þe fengið mér almennilega myndavél og farið út í ljósmyndun ?
Svo þegar haustlitirnir eru farnir, þá kemur veturinn með snjóinn og alveg nýja ásýnd ! og nýtt myndefni ! vá - í fyrsta skipti í langan tíma - held ég bara í fyrsta skipti alveg - hlakka ég pínu til að fá snjóinn...
sunnudagur, september 25, 2011
Rólegur sunnudagur
átti dásamlegan sunnudag. Fór í sveitina mína sem skartar sínum fegurstu litum núna. Labbaði um Belgjarskóg með myndavélina mína. Algjör snilld. Kyrrðin og fegurðin. Fuglarnir og flugurnar. Reynar fékk ég alveg að heyra það frá nokkrum rjúpum sem voru sko alls ekkert hressar með þetta uppátæki mitt. En ef mann vantar að fara og kúpla sig alveg úr amstri dagsins þá er þetta það sem ég mæli með.
Annars er voða skrýtið að hafa ekkert til að stressa sig yfir. Allt er eins og það á að vera. Þannig vonandi get ég tekið fleiri svona daga eins og í dag.
miðvikudagur, september 21, 2011
Stund á milli ....
í dag fórum við sonur og áttum smá stund á milli stríða. Sótti hann í skólann og við út í Kjarna. Hann að vaða og ég með myndavélina.
Alltaf afskaplega gott að komast út fyrir bæinn, þó það sé ekki lengra en í Kjarna. Með myndavélina á nefinu, bara að gleyma mér i eigin hugsunum að reyna að fanga eitthvað myndefni... stundum verða þau bara til stundum ekki..
þar til síðar elskurnar :)
föstudagur, september 16, 2011
sumarið mitt...
búin að eiga snilldar sumar ! en er bara ekki alveg reiðubúin fyrir veturinn strax. Sonurinn byrjaði í öðrum bekk og er afar sæll með þetta.
Helstu fréttir sumars eru þær að ég keypti íbúðina mína í Hjallalundinum. Stór ákvörðun, en góð. Mikið leið mér vel eftir að ég ákvað að taka stóra skrefið og verða fullorðin. Sá mig heldur ekki vera að fara neitt næstu árin á meðan sonurinn er svona ungur. Honum líður svo vel, ánægður í skólanum, góð regla á helgum með pabba hans og ferðirnar okkar í sveitina. Ég er ánægð í vinnunni, svo hvað annað þarf til ? Kostirnir eru miklu fleiri en gallarnir.
vona að þið eigið góða helgi sem enn kíkið hér inn reglulega. kannski ég ætti nú að bretta upp ermar og nota þetta blogg mitt aðeins meira ?
föstudagur, júní 17, 2011
17.júní…
Og það er rigning, og ekki einu sinni hátíðarhöld í sveitinni. En who cares. Komin í sumarfrí. Bústaður á sunnudaginn. Væri samt alveg til í að fara bara í dag.
föstudagur, febrúar 11, 2011
hvar er sumarið.. ?
Veit ég er löt að blogga þessa dagana. Ekki að það sé mikið að gera, dagarnir hverfa bara. Ljósi punkturinn að eftir hvern dag þá er einu degi styttra í sól og sumar...